நான் உனக்கு மிகப் பெரும்
அன்பின் சாயலை
பரிசளிக்க விரும்புகிறேன்
என் இதயத்திலிருந்து
பிரித்து வைத்திருக்கும்
தூய அன்பின் துகள்களை
உனக்குக்காட்ட விரும்புகிறேன்
பகல் நேர மின்மினிகள்
இறக்கையில்லா வண்ணத்துப்பூச்சிகள்
கொடுக்கு இல்லா தேள்கள்
மகரந்தம் செய்யா வண்டுகள் என
உனக்கு
சரிபாதி அன்பையும்
வறுமைப்படும் துயரத்தையும்
காட்ட விரும்புகிறேன்
ஒரு பாரப்படுத்தல்
ஒப்புக்கொடுத்தலின்
உண்மைச்சுவடுகளை
உனக்குத்தர விரும்புகிறேன்
இருபக்கம் இழுக்கும் கயிற்றில்
எதிரெதிர் முனைகளை
நானே பிணைத்துவிடுகிறேன்
உலகம் ஓர் அன்பின் இயக்கப்பாடு என
உனக்கு நான் உணர்த்த வேண்டும்
ராத்திரி நேர ஒற்றையடிப்பாதையில்
லாம்பு வெளிச்சத்தில் பயணிக்கும்
பாதை தெரிந்த
பழுத்த கிழவனைப்போல
என் வாழ்க்கை முழுவதையும்
உனக்கு நான் காட்ட வேண்டும்
பயணங்கள் பிரிந்துவிட்டதால்
என் தலையை பிறிதொரு தோளில்
இளைப்பாற வைத்து விடாதே
அன்பு ஒரு முற்றுகையிடல்
அது எல்லோராலும் நிகழ்ந்து விடுவதில்லை
பதிந்துவிட்ட ரேகைகளைப் போல
ஒன்றிலிருந்து பிரிக்க முடியா
அன்பின் வாசஸ்தலங்களின் வாயிலை
அப்படியே அடைத்து விடாதே
எப்போதும் நான் உனக்கு
மிகப் பெரும் பேரன்பின் சாயலையே
பரிசளிக்க விரும்புகிறேன்
