ஒரு வார்த்தை..

பதிவிட்டவர்

May 5, 2019

1476

நீ எதைப் பற்றியேனும் பேசிடு
முள்ளடர்ந்த காடுகளுக்குள்
தவத்தையும்
என் தனிமையையும் கலைத்திட
எதைப்பற்றியேனும் பேசிடு

அலாதியான விருப்பங்களை உடைத்தெறியும்
உள்ளிறுகிய உன் பாறைகளுக்கு
இடுக்கும் இடைவெளியும்
இல்லை என
சொல்வதற்கேனும்
எதைப்பற்றியேனும் பேசிடு

நீள் நொடிகளில்
நிரம்பிய ஞாபகங்களை
இழுத்துப் பிடித்தோ
தூரம் தள்ளியோ
எறிவதற்காகிலும்
நீ எதைப்பற்றியேனும் பேசிடு

எப்போதும் என் கன்னங்கள் பற்றும் கரங்களிலும்
விழி மையிடும் விரல்களிலும்
இன்னமும் கொஞ்சம் நேசமும் காதலும்

மீதமிருப்பதை சொல்வதற்காகிலும்
எதைப்பற்றியேனும் பேசிடு

பயண வழிகளில்
ஒழியும் தேவதைகள் பற்றியோ
தொடரும் சாத்தான்கள் பற்றியோ
நம்பிக்கை எச்சரிக்கை
இரண்டில் ஒன்று தருவதற்காகினும்
எதைப்பற்றியேனும் பேசி விடு

குறைந்தபட்சம்
இன்றோ நாளையோ
நடக்கப் போகும்
என் மூளைச் சாவினை பொய்ப்பிப்பதற்காகினும்
எழும்பி ஒரு முறையாகிலும்
என்னோடு
நீ எதைப்பற்றியேனும் பேசிடு….