இதெற்கெல்லாம் ஒரு கொடுப்பினை வேணுமப்பா
அதிகம் கேட்டொழிந்த வார்த்தைதான் பலருக்கு
கொடுப்பினை என்பது உண்மையில் என்ன
ஏதோ ஓர் ரகசியம் போலவே இந்தக் கொடுப்பினை இருக்கிறது
என்னைப் பொறுத்தவரை
முயற்சி மட்டுமே இது நாள் வரை கொடுப்பினை என்று எண்ணிக்கொண்டிருந்தேன்
ஆனால் கொடுப்பினை என்பது இறைவன் பார்த்துத் தருவது என்றார்கள்
முயற்சி தன் மெய் வருத்தக் கூலிதரும் என்பது மனப்பாடமாயிருந்தும்
நிஜழ்வாழ்வில் ஏன் ஒத்துப்போகவில்லை
இறைவன் எப்போதுமே முயற்சியாளர்களை கைவிடுவதில்லையே
ஆமாம் அதற்கெல்லாம் ஒரு கொடுப்பினைதான் வேணும்போலும்
கொடுப்பினை என்பது
ஏமாற்றத்திற்கு நாம் சொல்லிக்கொள்ளும் சால்ஜாப்பா என்ன
சரி இதுவும் கடந்து போகும் என
கைகளைதட்டி தோள்களை குலுக்கி நகர்ந்து விடுவதற்கான ஓர் ஆறுதலா என்ன
கொடுப்பினை எந்த ரூபத்திலும் அரூபத்திலும் இருக்கட்டும்
வேகமாய் ஓடி நடந்து களைத்துப் போய் இருக்கையில் தடுக்கிவிடும் கல்லாக இல்லாமல் விட்டாலே போதும்
கொடுப்பினை என்பது அருளப்படாத நியதியாகவே இருந்து விட்டுப்போகட்டுமே
அதனால் என்ன
எப்போதாகிலும் ஓர்நாள்
முயற்சியும் மெய்வருத்தக் கூலிதரும்
என்ற நம்பிக்கையை இன்னும் கொஞ்சம் ஆழமாநம்ப வேண்டும்
அவ்வளவுதானே..?
