பிரமித்துப் போகிறேன்

பிரமித்துப் போகிறேன்
வளர்ந்து கொண்டேயிருக்கும் வான்வெளியை
வகைவகையாய் கண்களால் அளவாதவர்களைப் பார்த்து

பிரமித்துப் போகிறேன்
கட்டில்லா காலவோட்டத்தில் பயணித்துக்கொண்டே
கடுகளவும் வரலாறு அறியாதவர்களைப் பார்த்து

பிரமித்துப் போகிறேன்
புத்தகங்களின் உலகின் இதுவரை
புகுந்திராதவர்களைப் பார்த்து

பிரமித்துப் போகிறேன்
கம்யூனிசம் போன்ற வார்த்தைகளை
காதால் கூட கேட்டிடாதவர்களைப் பார்த்து

பிரமித்துப் போகிறேன்
அளவற்ற தொழிநுட்பத்தில் தொலைந்து கொண்டே
அமெரிக்க அமைவிடமேனும் அறியாதவர்களை பார்த்து

பிரமித்துப் போகிறேன்
அகண்ட பிரபஞ்சப் பெருவெளியின் எல்லையை
அறிந்திட முற்படாதவர்களை பார்த்து

மீண்டும் நான்
பிரமித்துப் போகிறேன்
பலர் பிரமித்துப் போய் நின்று கொண்டிருக்கிறார்கள்
என்னைப் போன்ற இன்னும் சிலரை பார்த்து….